Dekabrın 4-də, AMEA N.Tusi adına Şamaxı Astrofizika Rəsədxanasında növbəti astroseminar keçirilib.
Seminarın rəhbəri, f-r.ü.f.d Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu haqqında ətraflı məlumat verib.
Daha sonra rəsədxananın “Planetlər və kiçik səma cismləri” şöbəsinin elmi işçisi Fazil İsmayılov "Mars planetinin səthinin spektral parlaqlıq əmsalının araşdırılması üçün qaranlıq obyektin çıxılması üsulunun tətbiqi" mövzusunda məruzə ilə çıxış edib.
Məruzəçi seminarda müasir dövrdə geofiziki informasiya sistemində (GİS) atmosferin, Yer səthinin öyrənilməsi üçün DOS (Qaranlıq Obyektin Çıxılması) üsulundan geniş istifadə olunduğunu bildirib. Məruzədə ilk dəfə DOS üsulu Mars planeti səthinin öyrənilməsi üçün istifadə olunub. Planetin müxtəlif regionlarına dair kosmik təsvirlər emal olunub. Həmin təsvirlərdə planetin səthinin optik təzadlarının təhlili aparılıb.
Məruzə tədbir iştirakçıları tərəfindən maraqla qarşılanıb, mövzu ətrafında müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
