12-14  oktyabr  2026-cı  il  tarixlərində  Yaponiyanın  Tokio  şəhərində  “Astronomy  2026:  International  Conference  on  Astronomy,  Astrophysics  and  Space  Science”  mövzusunda  beynəlxalq  elmi  konfrans  keçirilib.  Beynəlxalq  tədbirdə  dünyanın  40-dan  çox  aparıcı  elmi  mərkəzini  təmsil  edən  alim  və  tədqiqatçılar,  o  cümlədən  Elm  və  Təhsil  Nazirliyi  N.Tusi  adına  Şamaxı  Astrofizika  Rəsədxanasının  (ŞAR)  "Nəzəri  Astrofizika  və  Kosmologiya"  şöbəsinin  aparıcı  elmi  işçisi,  fizika-riyaziyyat  üzrə  fəlsəfə  doktoru,  dosent  Məhəmməd  Nurməmmədov  iştirak  edib.

15 sessiya bölməsi üzrə təşkil olunan konfransın “Astrofizika və Kosmologiya” üzrə paralel texniki sessiyasında alimimiz əsas məruzəçi (Keynote Speaker) qismində çıxış edib. O, “Qeyri-klassik riyazi fizika tənliklərinin tətbiqi ilə maqnit ulduzlarında toroidal plazma və sahədə magnithidrodinamik tarazlığın tədqiqi” (An Application of Non-Classical Equations of Mathematical Physics to Magnetic Stars for the Investigation of Magneto-Hydrodynamic Equilibrium with Toroidal Plasma and Field) mövzusunda elmi məruzəsini təqdim edib.

Məhəmməd Nurməmmədov çıxışında bildirib ki, maqnit ulduzlarında toroidal sahənin birbaşa müşahidəsi son dərəcə çətin, bəzi hallarda isə qeyri-mümkün olduğundan bu istiqamətdə nəzəri metodlarla aparılan tədqiqatlar xüsusi əhəmiyyət kəsb edir. Alim maqnitsferdə Lorens qüvvəsi, plazma təzyiq qradiyenti və mərkəzdənqaçma qüvvələrinin tarazlığı əsasında maqnithidrodinamik tarazlıq şərtini müəyyən etmək üçün ilk dəfə qeyri-klassik riyazi fizika tənliyini tətbiq etdiyini diqqətə çatdırıb. Həmçinin diferensial fırlanmada “poloidal” və “toroidal” maqnit sahələrinin dayanıqlı təsirini saxlayan şərtlər müəyyən olunub, model tənlikdə cırlaşma və sinqulyarlıq xüsusiyyətlərinin fiziki mahiyyəti (“cut-off”, “resonance”) təhlil edilib.

Məruzə iştirakçılar tərəfindən böyük maraqla qarşılanıb və verilən suallar ətraflı cavablandırılıb.

Sonda ŞAR əməkdaşı Məhəmməd Nurməmmədova fəal iştirakına görə konfransın Elmi Komitəsi tərəfindən xüsusi minnətdarlıq məktubu və iştirakçı sertifikatı təqdim olunub.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.